Чӑваш Енӗн вице-премьерӗ — сывлӑх сыхлав министрӗ Владимир Степанов палӑртнӑ тӑрӑх, республикӑра эпидемиологи лару-тӑрӑвӗ кунсерен япӑхса пырать. Ҫурла уйӑхӗн 1-мӗшӗ тӗлне илсен, 350 пациент килте сипленнӗ пулсан, халӗ ҫак цифра 2723-е ҫитнӗ. 206 пациента пульницӑна вырттарнӑ.
Владимир Степанов пурне те вакцинаци витӗр тухма чӗнсе каланӑ. Хальхи вӑхӑтра вакцинацин вӑтам кӑтартӑвӗ — 78,3 %. Ҫав вӑхӑтрах хӑш-пӗр муниципалитетра ку цифра 70-тен пӗчӗкрех. Ку списокра — Улатӑр хули, Улатӑр, Элӗк, Вӑрнар, Вӑрмар, Шӑмӑршӑ, Елчӗк тата Тӑвай районӗсем.
Тӑвай районӗнчи Енӗш Нӑрваш ялӗнче 27 ҫулти ҫамрӑка вӗлернӗ. Следстви комитечӗн Чӑваш Енри следстви органӗсем шӑллӗне, 20 ҫулти ҫамрӑка, тытса чарнӑ, ун тӗлӗшпе пуҫиле ӗҫ пуҫарнӑ.
Следстви версийӗ тӑрӑх, ҫурла уйӑхӗн 25-мӗшӗнче ҫӗрле 20-рискер килӗнче ӳсӗр пулнӑ, пиччӗшӗпе хирӗҫсе кайнӑ. Вӑл пӗртӑванне кӑкӑрӗ тӗлӗнчен ҫӗҫӗпе чикнӗ.
Пиччӗшӗ йывӑр сурансене пула ҫавӑнтах вилнӗ.
Паян Тӑвай районӗнче автобус ҫырмана ҫаврӑнса ӳкнӗренпе 20 ҫул ҫитнӗ. Ку инкек шӑп та лӑп ҫурлан 18-мӗшӗнче, 2002 ҫулта, пулнӑ.
Автобус Тӗнеялӗнчен Канаша кайма тухнӑ. Ун чухне Шупашкар хули ҫуралнӑ кунне паллӑ тунӑ. Инкек пулсан та мероприятисене пӑрахӑҫламан.
Аварире 25 ҫыннӑн пурнӑҫӗ татӑлнӑ. Вӗсен йышӗнче - 5 ҫулти ача. Салонра пӗтӗмпе 60 ҫын пулнӑ. 38 ҫын аманнӑ.
Халӗ ҫав вырӑнта часавай лартнӑ. Ӑна 2012 ҫулта уҫнӑ.
Морис Яклашкин дирижёр паян, ҫурла уйӑхӗн 4-мӗшӗнче, 75 ҫул тултарать. Вӑл Чӑваш патшалӑх академи симфони капеллин дирижёрӗнче ӗҫлет.
Морис Николаевич Тӑвай районӗнчи Чутей ялӗнче ҫуралнӑ. Канашри педагогика училищинче, И.Я. Яковлев ячӗллӗ Чӑваш патшалӑх педагогика институчӗн музыкӑпа педагогика факультетӗнче, Горький хулинчи М.И.Глинка ячӗллӗ патшалӑх консерваторийӗн дирижерпа хор факультетӗнче вӗреннӗ.
«Тутарсен симфони оркестрӗ пур. Эпир мӗнпе кая текен шухӑш Чӑваш патшалӑх телерадиокомпани хорӗнче ӗҫленӗ чухнех мана канӑҫ памастчӗ. Моцарт, Бах, Чайковский, Рахманинов, Римский-Корсаков тата ытти классик хайлавӗсене юрлаймастӑмӑрччӗ. 2000 ҫулта республика правительствине симфони оркестрӗ йӗркелеме пулӑшма ыйтрӑм. Пулӑшрӗҫ», — аса илнӗ вӑл интервьюсенчен пӗринче.
Морис Яклашкин — Чӑваш АССРӑн тава тивӗҫлӗ ӳнер ӗҫченӗ, Раҫҫейӗн тава тивӗҫлӗ ӳнер ӗҫченӗ, Чӑваш Республикин хисеплӗ ҫынни.
Чӑваш Енре килес ҫул приватизацилемелли куҫман объектсен списокне палӑртнӑ. Унта икӗ лаптӑка кӗртнӗ: 7 595 тӑваткал метр (кадастр номерӗ 21:26:110101:2) тата 619 тӑваткал метр (кадастр номерӗ 21:26:110109:235) лаптӑк йышӑнакан икӗ участок. Вӗсем иккӗшӗ те Тӑвайӗнче вырнаҫнӑ.
Ҫӗре сутсан республика хыснине 13,2 миллион тенкӗрен кая мар укҫа кӗрӗ.
Приватизацие пула 2016 ҫулта пирӗн республика 379 млн тенкӗ тупӑш илне, 2017 ҫулта — 120,4 млн тенкӗ, 2018 ҫулта — 98,3 млн тенкӗ, 2021 ҫулта — 34,5 млн тенкӗ.
Чӑваш Енри коммуналлӑ хуҫалӑхра ӗҫлекенсем асӑннӑ отрасль объекчӗсене хӗле хатӗрлессипе ҫине тӑраҫҫӗ. Ӗнерхи кун тӗлне илсен, ӗҫе 59,9 процент чухлӗ пурнӑҫланӑ.
Ӗҫ хӑвӑртлӑхӗ енчен Йӗпреҫ (29,0%), Сӗнтӗрвӑрри (31,4%), Ҫӗмӗрле (32,5%) тата Ҫӗрпӳ (34,6%) районӗсем юлса пыраҫҫӗ.
Коммуналлӑ хуҫалӑх объекчӗсене хӗле хатӗрлессипе Улатӑр, Элӗк, Патӑрьел, Комсомольски, Хӗрлӗ Чутай, Шӑмӑршӑ, Тӑвай районӗсем тата Улатӑр хули малта. Вӗсенче палӑртнӑ ӗҫ калӑпӑшӗн 70 процентне пурнӑҫланӑ.
Чӑваш Ен урлӑ иртекен «М-12» ҫула 2023 ҫулта хута яма палӑртаҫҫӗ. Нумаях пулмасть ҫак ыйтупа РФ Правительствин Председателӗн заместителӗ Марат Хуснуллин канашлу ирттернӗ.
Аса илтерер: машинӑсене хӑвӑрт ҫӳремелли ҫав ҫул пирӗн регионта 100 километар яхӑн пулӗ. Ӑна Ҫӗмӗрле, Вӑрнар, Йӗпреҫ, Комсомольски, Канаш тата Тӑвай районӗсем урлӑ сарӗҫ.
«М-12» ҫулӑн Мускаври МКАД патӗнчен пуҫӑнса Орехово-Зуево хули таранхи пайне кӑҫал хута ярӗҫ, Чӑваш Енри лаптӑка килес ҫул туса пӗтересшӗн.
«М-12» ҫула 2023 ҫулта хута ярасшӑн. Унпа Мускавран Хусана 6-7 сехетре ҫитме май килӗ.
Тӑвай районӗнчи Енӗш Нӑрваш ялӗнче пурӑнакан 53 ҫулти арҫынна суд тунӑ. Ӑна колоние мар, психиатри пульницине ӑсатма йышӑннӑ.
Следстви тата суд палӑртнӑ тӑрӑх, кӑҫал нарӑс уйӑхӗн 8-мӗшӗнче каҫхи 6 сехетре вӑл 51 ҫулти шӑллӗпе хирӗҫсе кайнӑ. Хайхискер ӑна пуҫӗнчен, кӗлеткин ытти пайӗнчен 42 хутран кая мар ҫапнӑ, тапнӑ. Лешӗ вилмеллех суранланнӑ.
Судпа психиатри экспертизи ҫирӗплетнӗ тӑрӑх, 53 ҫулти арҫын преступлени вӑхӑтӗнче хӑй мӗн тунине ӑнланман. Ҫавна май суд ӑна психиатри пульницине сипленме яма йышӑннӑ.
Тӑвай районӗнче пурӑнакан арҫын килте патронсем упранине тупса палӑртнӑ. РФ Следстви комитечӗн Чӑваш Енри следстви органӗсем ун тӗлӗшпе пуҫиле ӗҫ пуҫарнӑ.
Следстви версийӗ тӑрӑх, 2016 ҫулхи ҫулла 50 ҫулти арҫынна пӗлӗшӗнчен 1732 патрон еткерлӗхе лекнӗ. Вӗсем спорт тата сунар пӑшалӗ валли. Экспертиза палӑртнӑ тӑрӑх, патронсен пӗр пайӗ пеме юрӑхлӑ.
Арҫын тӗлӗшпе пуҫарнӑ пуҫиле ӗҫе малалла тӗпчеҫҫӗ. Тӗрлӗ экспертиза ирттерӗҫ, кӳнтеленсенчен ыйтса пӗлӗҫ.
Тӑвай районӗнчи Енӗш Нӑрваш ялӗнче кӑҫалхи нарӑс уйӑхӗн 8-мӗшӗнче 18 сехетре 53 ҫулти арҫын хӑйӗнчен икӗ ҫул кӗҫӗнрех шӑллӗне вӗлернӗ. Ӑна вӑл тапса-ҫапса пӗтернӗ. Пурӗ 42 хутран кая мар. Шар курни кӑштахран вилсе кайнӑ.
Пӑтӑрмах тӗлӗшпе пуҫиле ӗҫ пуҫарнӑ, судпа медицина экспертизи те ирттернӗ. Тухтӑрсем 53 ҫулти арҫын ӑс-тӑн чирӗпе нушаланнине палӑртнӑ. Ӑна суд ахӑртнех психиатри больницине ӑсатӗ. Пуҫиле ӗҫе суда ярса панӑ ӗнтӗ.
+2.3 °C